ہم نے جب اُن سے پہلی ملاقات کی
آخری بات تھی وہ جو اک بات کی
چاند سورج ستارے سبھی پا لئے
چھٹ نہ پائی مگر تیرگی رات کی
خونِ دل سے لِکھی داستانِ سفر
ہم نے کاغذ پہ اشکوں سے برسات کی
حُسن کے ناز کو جس نے گھائل کیا
کِرچیاں تھیں وہ میرے خیالات کی
زندہ لوگوں سے اُن کے مکاں چھین کر
ہو رہی ہے سجاوٹ مزارات کی
جشن مل کر منائیں نہ کیوں موت کا
سوگواری تو بدلے گی حالات کی
تم نے الطاف دل کھول کر رکھ دیا
بات ایسی کہی بس کہ کیا بات کی
۔۔۔۔۔۔۔۔۔۔۔۔۔۔۔۔۔۔
محبت کا وہ سلسلہ کیا ہُوا
تِرا مجھ سے عہدِ وفا کیا ہُوا
کہاں کھو گیا تیرا شوقِ جُنوں
تِرا ذوقِ آتش نُما کیا ہوا
خزاں تھی مخالف چمن زار کی
مگر تُجھ کو بادِ صبا کیا ہُوا
بڑا ناز تھا تجھ کو احباب پر
سِتم تُجھ پہ کس نے کیا ، کیا ہُوا
دمِ قیس سے تو بیاباں بَسے
مگر بعد میں شہر کا کیا ہُوا
